Siglir tar il cuntegn

Header

Center da sport e cultura a Mustér
Legenda: La suprastanza communala è persvasa ch'ella ha chattà la dretga persuna per engrondir e vender meglier il Center da sport e cultura. RTR, G. Hosang
cuntegn

Surselva Critica vers elecziun dal nov manader dal center da sport

A Mustér datti critica che la suprastanza communala n'haja betg elegì ina persuna indigena sco manader dal Center da sport e cultura.

Suenter che la suprastanza communala da Mustér ha communitgà ch’ella haja elegì sco nov manader dal Center da sport e cultura a Mustér Herbert Schmelzer da Valbella datti ussa critica envers questa decisiun. La critica vegn en furma d’ina brev averta dad ina gruppa da giuvenils da Mustér. Sco l’iniziant da questa brev, Flavio Steger, ha ditg a Radiotelevisiun Svizra Rumantscha, n'hajan els betg chapientscha che la politica na procuria betg che bunas plazzas vegnian occupadas da persunas indigenas. Quai purschess a quellas ina buna existenza en vischnanca. I saja gia grev avunda per giuvnas e giuvens da chattar ina buna plazza en la regiun.

Qualificaziuns giavischadas mancavan

Sco il president da vischnanca Francestg Cajacob ha ditg, avess la suprastanza communala gugent elegì ina persuna indigena. Cunquai ch’il Center da sport e cultura a Mustér haja ina irradiaziun regiunala e chantunala ed era en vista a las investiziun futuras, saja la qualificaziun stada pli impurtanta per l’elecziun che la derivanza dal candidat. Herbert Schmelzer, che lavura actualmain en ina posiziun da cader tar la Migros, saja sa scolà sin il sectur da marketing e vendita. Questa qualificaziun saja fitg impurtanta per pudair ademplir las pretensiuns ch’il cussegl da vischnanca ha mess per il center, declera Francestg Cajacob. Tranter auter pretenda il cussegl da vischnanca, ch’il deficit annual vegnia reducì cun vender meglier las purschidas ed occupar bain las localitads.

Uniuns indigenas ston desister a favur dad occurrenzas ed esters

Gist quai fa dentant era mal il venter a Flavio Steger. Tenor el ston las uniuns indigenas gia ussa desister da las hallas, perquai che questas èn occupadas entras esters. Sch’il center vegnia occupà anc pli fitg, muntia quai, ch’ins stoppia anc pli savens desister da las localitads, di Flavio Steger. Il president da vischnanca relativescha dentant. I dettia situaziuns, nua che las uniuns stoppian desister, quai saja uschia. Dentant restian anc bleras emnas nua ch’ils indigens possian far diever da las hallas da gimnastica per in pretsch fitg favuraivel.

Herbert Schmelzer vegn a sa chasar cun sia famiglia a Mustér ed entschaiva il settember ses nov post a Mustér, ha ditg Francestg Cajacob.

Artitgels legids il pli savens

Scrollar a sanestra Scrollar a dretga