12% da la surfatscha dal guaud da la Surselva ha problems da sa regiuvinar pervi da l'influenza memia gronda da la selvaschina. Il 2003 era quai anc 15%. L'influenza da la selvaschina sin il guaud giuven è evidenta, n'è dentant betg creschida durant ils ultims onns. Quai resulta dal rapport davart il guaud e la selvaschina en Surselva 2018 ch'il chantun ha edì e che remplazza quel dal 2003.
Il rapport 2018 mussa er ch'ulteriurs 11% da las surfatschas da guaud en Surselva èn influenzadas fitg da la selvaschina d'ungla e che la preschientscha d'animals da rapina gronds è creschì marcantamain. Plinavant è dapi il 2003 er la surfatscha d'observaziun creschida per 10%.
Stentas vegnan cuntinuadas
L'Uffizi da guaud e privels da natira fa cler en ses rapport che las stentas communablas da chatschaders e selviculturs ston cuntinuar. En Surselva funcziuna quella collavuraziun bain ed ils pertutgads èn en in dialog permanent. Be cun ina regulaziun da la selvaschina entras las differentas chatschas saja pussaivel da tegnair sut controlla il dumber d'animals. Plinavant saja er vinavant necessari ch'ils selviculturs emplantan nua ch'igl è necessari. En Surselva è surtut l'aviez pertutgà dals donns entras tschiervas e chavriels.
RR novitads 12:00
