Cuntrafa la Lumnezia al contract da fusiun?

La suprastanza da la vischnanca Lumnezia duai vegnir reducida da nov sin tschintg persunas. Quai è in giavisch da la suprastanza actuala.

La porta da Porclas è in mir cun ina entrada a  la entschatta da la Lumnezia Bild in Lightbox öffnen.

Legenda da maletgs: La porta da Porclas fa attent che la Lumnezia defenda ses dretgs RTR, L. Livers

Sco quai che Thomas Kollegger il manader da l’Uffizi da vischnancas di, pretendia il contract da fusiun che mintga anteriura vischnanca da la Lumnezia possia metter in commember en suprastanza. Pia otg vischnancas cun mintgamai in commember e latiers anc il president, uschia datti ina suprastanza da nov persunas. Kollegger di, che quest contract da fusiun saja liant.

Duri Blumenthal, fa valair che gia l’emprima suprastanza elegida suenter la fusiun n’haja betg correspundì a quella pretensiun. La fracziun da Vignon n’è betg represchentada en la suprastanza actuala. Persuenter ha Vella dus represchentants en suprastanza. Sch’ins prendi dapart la suprastanza actuala possian ins era dir che Lumbrein saja represchentà cun quatter persunas oriundas da Lumbrein.

La vischnanca da la Lumnezia vegn orientada ils 14 d’avust sur dals plans da reducir la suprastanza. Fin l’ atun 2016 duai quai esser sclerì sch’igl è pussaivel da far questa midada gia suenter quatter onns, pia gia suenter l’emprima perioda d’uffizi.