En il film di la mamma ch’il Gieri haja fitg bler temperament ed energia; e quai haja duvrà inqual giada gronda pazienza. Oz – set onns pli tard – ha el sez in figl da passa trais onns e mez. Blers dian che ses figl saja la copia dad el; ed uss possia el vesair, co ch'el era sco pitschen.
I n'è betg adina lev, ma igl è segir pli bel d’avair glieud che ha energia che da quels che sesan mo enturn.
Gieri Cathomas lavura tar la firma Swiss Prevention Clinic. Las duas firmas anteriuras, Smoothline e Double Check, ha el vendì. La Swiss Prevention Clinic PC na fa betg operaziuns esteticas (sco la Smoothline fascheva). Els hajan mo ina pratica pitschna cun dus cardiologs e fetschian las emprimas intervistas cun ils pazients per guardar, tge ch’els dovrian. Sche quai dat alura ina operaziun, van ils pazients en ils ospitals da Turitg ubain en clinicas privatas.
Stretg contact cun la famiglia a Sumvitg
L’um da 43 onns ha mantegnì in stretg contact cun sia famiglia a Sumvitg. Là vegn el tant sco pussaivel cun sia dunna e ses dus uffants pitschens. El sappia danunder ch’el vegnia e nua che sias ragischs sajan.
Cura che jau sun a Sumvitg sun jau forsa il stroli da pli baud e na stoi betg guardar sin las normas uschè fitg sco a Turitg.
RR actualitad 11:00