Siglir tar il cuntegn

Surselva Cuorsa dil Rein fa in onn pausa

Il comité d’organisaziun da la Cuorsa dil Rein ha decidì da far in onn pausa cun la cursa.

Partenza dad ina da las cursas da la Cuorsa dil Rein 2015.
Legenda: Partenza dad ina da las cursas da la Cuorsa dil Rein 2015. mad

I haja dà differentas raschuns per far ina pausa cun l’occurrenza, declera Roger Tuor, il president dal comité d’organisaziun. Dad ina vart saja il comité d’organisaziun in pau stanchel e da l’autra vart manchian l’auter onn pliras persunas da quest comité. Betg sco davos giajan las reservas finanzialas plaunsieu a fin, perquai ch’i dettia mintga onn in deficit. «L’idea da far ina pausa è da ponderar las disciplinas ed ils trajects per uschia dar nov schlantsch» di Roger Tuor. Latiers sajan ils resuns dals curriders d’impurtanza. Uschia vegn ponderà da propi far ina cursa dal Rain cun cumenzar a Sedrun e currer per lung dal Rain fin a Trun ubain era da porscher ina cursa che maina siadora vers la pizza. Ch’ina pausa pudess forsa muntar la fin da la Cuorsa dil Rein, na crai Roger Tuor betg. Il comité d’organisaziun haja decidì da na betg dar si la cursa. Tar ils curriders spera Roger Tuor che quels vegnian era puspè sch’i dettia in onn pausa.