Sco quai ch’il maina gestiun da la butia Maxi Fredy Caminada ha ditg, quinta el serrar la butia en il decurs dal 2017. Cura exact vul el dir pir suenter avair discurrì cun la vischnanca.
La vischnanca da sia vart ha fatg ina retschertga tar la populaziun e tar possessurs da segundas abitaziuns. Il resultat dals 150 questiunaris returnads è tenor il suprastant communal Giusep Flepp cler: 90% avessan gugent che la butia restia en il vitg. Ussa tschertga la vischnanca ina persuna che avess interess da manar la butia. En tge furma e cun tge furniturs, quai possia questa persuna decider sezza, declera Giusep Flepp.
Sch’i na dettia nagin che s’annunzia, lura stoppia la gruppa da lavur anc ina giada ir sur ils cudeschs. I na saja dentant betg chaussa da la vischnanca da manar ina stizun, di Giusep Flepp. Ella possia sulettamain stgaffir bunas premissas da rom, sco per exempel ina contribuziun da fundaziun u tschains d’affittaziun favuraivels.
Contract fin il 2018
Il contract d’affittaziun da las localitads da la butia, che tutgan a la vischnanca, scada pir il 2018. Giusep Flepp manegia, che sch’i dettia ina soluziun per la butia na saja quai nagin problem da schliar il contract cun Fredy Caminada. Ma era sch’i dettia a curta vista nagina soluziun, vegnia la vischnanca a schliar il contract d’affittaziun.
RR actualitad 17:00