Siglir tar il cuntegn
Inhalt

Surselva Curaglia: products indigens èn tschertgads

Curt avant Curaglia en ina storta è gia dapi passa 10 onns durant la stad in stan nua ch’i vegn vendì la fin d’emna products indigens. Malgrà ch’ils purs che han fatg quest stan fin ussa na fan betg sez il pur pli ed han laschà a tschains il bain puril vegn manà vinavant il stan cun il num Curva.

Ils dus magiurs dal bain puril, Eveline Hauser e Dominik Waldmeier, n’han betg sez temp da star davos il stan e vender ils products. Perquai ha lur cunabitanta Tabea Baumgartner prendì l’iniziativa. Sco ella di è quai ina fitg buna plattafurma ed era ina schanza per vender ils products indigens.

Profitar da quai profiteschan betg mo purs, mabain era autras persunas e fatschentas che produceschan products da la regiun. Betg sco ultim lubescha la buna vendita da products era dad indemnisar las trais persunas che lavuran alternant sin quai stan declera Tabea Baumgartner.

Vendì vegnia cunzunt chaschiel e charn. Il stan porscha dentant bler dapli. Davent dal jogurt, sur il mel d’avieuls e pettas cun paira datti ina gronda paletta da products. Sco Tabea Baumgartner di possia questa purschida era crescher vinavant.