Durant circa 1 mais emprendan ils uffants da programmar e quai cun il program XLogo. Cun quai program scriva l’utilisader ina seria da simpels cumonds per ina «tartaruga digitala», che sa mova sin il visur dal computer ni dal laptop. Cun sa mover malegia la tartaruga ina lingia ed uschia san ils uffants, tut tenor la cumbinaziun da cumonds, malegiar differentas chaussas. Davent da simpels objects geometrics sco in quadrangul enfin objects cumplitgads cun lingias da differentas lunghezzas e differents anguls.
Far gust da programmar
Tenor il manader da quai project Pascal Lütscher, docent a la scol'auta da pedagogia dal Grischun, è la finamira principala da dar als uffants in'idea tge che programmar vul dir. En la vita quotidiana daventia l’informatica adina pli impurtanta. Era objects sco p.ex. ina maschina da café hajan adina dapli computers per controllar il funcziunament, e quels computers stoppian vegnir mantegnids e reparads. En il futur dovria dapli informatichers e tras quai curs sa decidian forsa intgins uffants d’emprender quai mastergn.
Project interdisciplinar
Sper la chapientscha per geometria e matematica sustegnia il project era il svilup d’ulteriuras cumpetenzas dals uffants. Lavurar en team, analisar pass per pass ina furma, avair ina buna imaginaziun ed era la chapientscha da leger sajan cumpetenzas fitg impurtantas per savair programmar cun success la tartaruga digitala.
E buc sco davos hajan ils uffants simplamain plaschair da scriver curts programs e lura guardar, sche la tartaruga dissegnia propi quai ch’ella stuess.
RR actualitad 08:00