Il curs annual rumantsch sursilvan ha lieu gia dapi il 1969, pia per la 57avla giada. En otg differents nivels pon persunas interessadas emprender da discurrer e da scriver rumantsch sursilvan. Sper las lecziuns da lingua stattan sin il program chor, lavuratoris, guidas, sport, referats, concerts e prelecziuns. En tut visitan 124 participantas e participants quest onn il curs – trais uffants e 121 creschids.
Dalunsch davent arrivan intginas ed intgins
Dus dals creschids han gì in lung viadi. Arno Polage è viagià davent da Düsseldorf a Glion per pudair emprender rumantsch – e quai gia per la 9avla giada. Davos sia motivaziun d'emprender rumantsch stat in'istorgia:
Avant blers onns saja el stà en ina butia en Surselva ed haja udì che la vendidra ed era la clientella discurrivan rumantsch ina cun l'autra. El haja alura stuì discurrer tudestg standard, era sch'el avess gugent discurrì rumantsch. Suenter ch'el haja udì dal curs da rumantsch da stad en la televisiun, saja el s'annunzià per ses emprim curs. E saja vegnì adina puspè.
Curaschi – hai jau simplamain gì ina bucca gronda – u hai jau propi gust e plaschair d'empruvar? Jau hai lura propi fatg l'emprova e sun turnà mintg'onn.
En tut discurra Arno Polage otg linguas: tudestg, talian, franzos, ollandais, afrikaans, englais, svedais ed uss anc rumantsch. El haja simplamain plaschair vid linguas, era sch'el – sco policist – dovri darar tut quellas en ses mintgadi.
Lungs viadis per emprender rumantsch
-
Bild 1 von 2. Arno Polage è viagià da Düsseldorf fin a Glion per emprender rumantsch – e quai gia per la 9avla giada. Bildquelle: RTR.
-
Bild 2 von 2. Er Giulia Slater ha gì in lung viadi. Ella è vegnida dad Oxford fin a Glion cun tren per pudair visitar il curs rumantsch sursilvan. Bildquelle: RTR.
Ina ulteriura persuna cun in pli lung viadi è Giulia Slater. Ella steva pli baud en Svizra, uss è ella dentant pensiunada e stat ad Oxford. Il viadi fin a Glion haja ella fatg cun il tren.
Perquai ch'ella s'interessescha per linguas – principalmain per las minoritaras – haja ella gia vulì emprender rumantsch durant ses temp en Svizra. Ed uss veglia ella mantegnair sia savida e visita perquai il curs. Per che Giulia Slater vegnia en contact in pau cun il rumantsch era en ses lieu da domicil, guardia ella mintga di il Telesguard e legia cudeschs rumantschs.
Jau hai cumprà in t-shirt cun pleds rumantschs e jau aveva l'idea da currer enturn ad Oxford. Forsa vesa insatgi mai e discurra lura cun mai rumantsch.
Ad Oxford n'haja ella numnadamain anc betg chattà insatgi che discurria era rumantsch. Ma in'idea avess ella gia: Ir cun in t-shirt cun si pleds rumantschs tras la citad e spetgar fin ch'insatgi che sappia rumantsch pledentia ella.
Il curs annual rumantsch sursilvan ha pia gia uss in effect fin en terras estras.