Siglir tar il cuntegn

Header

cuntegn

Surselva Cussegl da vischnanca: «Ina buna schliaziun per Mustér»

L’atun èn a Mustér elecziuns communalas. Sco quai che retschertgas da Radiotelevisiun Svizra Rumantscha mussan, èsi da quintar cun pliras demissiuns da cussegliers da vischnanca.

audio
Saira: Vegn cussegl da vischnanca Mustér puspè mess en dumonda?
ord Actualitad dals 15.01.2016.
laschar ir. Durada: 3 minutas.

Ozendi n’èsi per il pli betg simpel da chattar persunas che s’engaschan en uffizis politics. Perquai sa tschenta era la dumonda schebain i dat ponderaziuns da schliar il cussegl da vischnanca da Mustér ed introducir la radunanza communala. Sco quai ch’il president da vischnanca da Mustér Francestg Cajacob di, n’è quai da vart da la suprastanza communala betg il cas. Quai malgrà ch’il program d’activitads da la vischnanca 2013/2016 prevesa ch’i vegn discutà davart las structuras politicas. Tenor Francestg Cajacob avess quest impuls da vegnir dals cussegliers ubain da la populaziun. Ussa saja quai dentant in pau tard da far la discussiun.

Sch’ins vul abolir il cussegl da vischnanca lura dovra quai ina midada da la constituziun e quella dovria temp. Perquai è Francestg Cajacob da l’opiniun ch’i saja da salvar il cussegl. «Il cussegl da vischnanca ha ina fitg veglia tradiziun a Mustér. I ha natiralmain sco tuttas instituziuns avantatgs e dischavantatgs. Ma tut en tut è quai ina buna schliaziun per Mustér» declera Francestg Cajacob.

Cussegl da vischnanca gia dapi passa 40 onns

Introducì il cussegl da vischnanca ha Dumeni Columberg, sco president da vischnanca da Mustér, avant passa 40 onns. Mustér enconuscheva gia ina tscherta sort cussegl davent da 1919. Represchentants dal vischinadis furmavan ina sort cussegl che vegniva era gist presidià dal president communal. Dumeni Columberg ha lura introducì in parlament communal sco quai ch’el sa preschenta anc oz. «I stat e croda cun l’engaschament da las persunas che satan a disposiziun» di Dumeni Columberg. Perquai saja quai impurtant da chattar persunas che s’interesseschan per quai che curra e passa en vischnanca. Tenor el vali la paina dad ir a la tschertga da talas persunas. I n’emporti nagut sch’i haja la radunanza communala u in cussegl, i dovri en mintga cas l’interess da la populaziun, da quai è el persvas.

La societad è sa midada

La societad saja sa midada entras l’individualisaziun ed era entras ils novs meds da communicaziun, manegia Dumeni Columberg. I manchian las la discussiuns ed ils discurs. Perquai saja era ozendi strusch ina persuna che s’annunzia da sasezza per surpigliar in post en il cussegl da vischnanca. Per far buna lavur en il cussegl da vischnanca na dovria quai betg scolaziuns spezialas. Mintgin che haja interess per quai che capita en vischnanca saja abel da far quai.

Las elecziuns communalas vegna ad esser la fin d’october. Sch’i è lura betg pussaivel da eleger in cussegl cumplet, lura stoppia la vischnanca a far ponderaziuns davart novas structuras politicas e far las midadas necessarias vid la constituziun, ha ditg Francestg Cajacob.

Artitgels legids il pli savens