Ils custs dal maun public per persunas en chasas da tgira èn repartids sco suonda : 25 % paja il chantun, 75 % las vischnancas. Per midar questa clav da repartiziun ha i gia dà intervenziuns en il Cussegl grond.
Chantun decida tariffas
Cura ch’ina persuna va en chasa da tgira, decida surtut il medi quanta tgira che questa persuna dovra. Ils custs da la tgira vegnan definids tenor in sistem da puncts da 0 -16. Il chantun ha fixà las tariffas, e dapli tgira ch’ina persuna dovra e dapli che quai custa. 16 puncts, pia la tariffa maximala, muntan custs da 504.- francs per di.
Furmas d'abitar alternativas
Tar la vischnanca da Mustér èn ils custs da sanadad creschids fermamain ils ultims trais onns. 2013 era quai anc 230'000 francs ad onn, 2015 passa 500'000 francs.
Francestg Cajacob manegia, ch’ina schliaziun fiss, da procurar ch’ils attempads pudessan passentar la saira da la vita en l’atgna abitaziun u chasa cun sustegn da la Spitex. Era il manader da l’uffizi da sanadad dal Grischun Rudolf Leuthold propona ina schliaziun sumeglianta cun furmas d’abitar alternativas. Impurtant saja da far ad uras intgins patratgs sur da l’atgna situaziun e da na spetgar fin che quai saja memia tard.