Er quest enviern ha la firma Montalta producì naiv artifiziala sin ses implant da glera a Schnaus. Er quest enviern ha ella fatg quai per la gronda part per l'Arena Alva. Lezza ha fatg diever da quest servetsch per la pista da scursalar a Falera, per il «ponylift» tar il lai a Laax e tar la staziun sut a Flem.
Igl è gnanc 1% da la naiv producida en l'Arena Alva.
Cunquai che l'Arena Alva na po betg producir la naiv en vischinanza da l'abitadi ed il stuschar giu la naiv fiss ina lavur che produciss medem bleras emissiuns, porta sia firma la naiv sut la pista, uschia Manuel Montalta, il mainafatschenta da l'interpresa da transport.
Nus gidain mo tar ils davos meters da la pista. Là nua ch'ins na po betg producir naiv, perquai ch'igl ha chasas dasperas.
Dapi 2018 producescha e transporta Montalta naiv. Tenor Manuel Montalta po sia firma far radund 4'000 meters cubic naiv en in enviern, tge che correspunda a radund 100 camiuns. Ma er sche la naiv è stada stgarsa quest onn, n'haja el betg producì dapli naiv sin ses implant.
Il futur duai esser senza camiuns
Il mainafatschenta da l'Arena Alva, Markus Wolf, discurra d'ina veglia cunvegnia cun la firma Montalta. En il futur veglia l'Arena Alva puspè producir la naiv en il territori e stuschar quella da surengiu per preparar la fin da la pista. Cun il svilup tar las maschinas da pista pon las emissiuns vegnir sbassadas en avegnir.
Il mument na datti betg maschinas da pista puramain electricas. L'Arena Alva posseda però duas maschinas da pista ibridas. L'interpresa da servetschs turistics è enconuschenta per ses accents en il turissem persistent. Cun ses concept «Greenstyle» vul ella daventar l'emprima destinaziun turistica che vegn da producir tut l'energia ch'ella dovra cun agens meds.