Siglir tar il cuntegn
cuntegn

Surselva Da Sedrun fin Andermatt sin ils skis

Ils ultims onns ha la Andermatt-Sedrun SA investì 130 milliuns francs per realisar la colliaziun dals dus territoris da skis. Las cabinas da 10 che mainan dal pass Alpsu sin il Schneehühnerstock èn uss realisadas ed ellas duajan vegnir avertas sin la proxima stagiun d’enviern.

Legenda: Guardar il video Sedrun ed Andermatt vegnan pli datiers in da l'auter. Durada 03:06 minutas.
Or da Telesguard dals 04.10.2018.

Fin che l’entir project ha la finala pudì vegnir realisà hai durà quasi 10 onns. E surtut las pretensiuns da las organisaziuns d’ambient han fatg fastidis als responsabels. Uschia han la finala 48 projects da detagl stuì vegnir elavurads e las lubientschas da la Confederaziun han plaz sin 1’300 paginas. Ma in dals success è che quai n’ha dà nagins recurs tar il Tribunal federal administrativ.

Ma ina da las sfidas era per il mainafatschenta da la Sedrun-Andermatt Sports Silvio Schmid è da coordinar il manaschi, ch’ha era stuì cuntinuar ils davos onns, ed l’entir project da construcziun gigantic.

Finamira è da ir cun skis da Mustér fin a Andermatt

Era la relaziun tranter las pendicularas da Mustér e da Sedrun/Andermatt saja sa megliurada ils ultims 5 onns. Uschia sajan ils dus possessurs Samih Sawiris e Marcus Weber dals tips anora sumegliants e uschia saja ina approximaziun stada pli simpla, di Schmid. Ma uss saja da realisar il pool da marketing communabel. Quel vegnia sin la proxima stagiun d'enviern e uschia ina purschida da las duas pendicularas che pudess avair in effect positiv sin tut ils acturs era sin quels che na sa participeschian il mument betg vida il pool, di Weber. El manegia qua Sedrun-Mustér Turissem che na vul betg far part al nov pool da marketing. Ma per Weber datti anc ulteriuras sfidas il proxim temp. La pendiculara nova sin il Cuolm da Vi vegn realisada sin la primavaira 2019 e per l'ustaria nova sin il Cuolm da Vi duai dar ina occurenza d'architectura ed l'ustaria duai propi esser ina purschida speziala cun ina vista dal pass Alpsu fin a Cuira.

RR actualitad 17:00