Entschet ha la dispita gia il 2012 avant la vendita dal Hotel Therme. Da lezzas uras appartegneva il hotel a la vischnanca e vegniva administrà da la Hoteba, ina societad ch’era a la vischnanca. Stefan Schmid, il president da vischnanca da Val s. Pieder declera che gia la Hoteba aveva l’aua termala gratuitamain.
Insatge auter sche vischnanca regala a sasezza
Ils burgais preoccupads en dentant da l’avis che quai è in zichel auter sche la vischnanca regala a sasezza l'aua, ni sche la vischnanca regala l’aua ad in investider. En il reglament da concessiun d’aua or da l’onn 2008 stat scrit: «sche il hotel mida possessur, ni sche la vischnanca ha pli pauc che 2/3 dal hotel, lura ha la vischnanca il dretg d'incassar daners da concessiun per l'aua.»
Stefan Schmid manegia dentant che cun la vendita dal hotel Therme, saja era vegnì contractà pervia dals tschains d’aua. Omaduas offertas ch’èn vegnidas inoltradas per la cumpra dal hotel prevesevan che la vischnanca dettia l’aua gratuitamain: pia tant en ils contracts da la gruppa enturn Zumthor sco era da Remo Stoffel eria nudà che l’aua saja gratuita.
Pievel ha decidì en chaussa
«Il pievel ha decidì en chaussa cura ch'el ha decidì da la vendita dal hotel», di Schmid. Per la vischnanca saja la chaussa cunquai terminada. Ins na possia ussa betg pli vegnir e vulair incassar tschains, sch'il contract prevedia insatge auter.