Sco la manadra dal museum, Dora Candinas, raquinta, vegnivan massa Giapunais avant 20 onns. Quels vegnivan en bus ed autocars, ed els enconuschan mintga detagl d’Alois Carigiet e da sias ovras. Dora Candinas raquinta in'anecdota d’ina gruppa da Giapunais ch vuleva ir in di en la chaplutta da morts, nua ch’il pictur-artist aveva malegià Nossadunna. Ella ha empruvà da declerar, ch’ins na possia ir en là, perquai ch’in vaschè cun in mort ed ils confamigliars sajan là. Mo ils Giapunais hajan insistì; ed ella haja manà els là. Ils confamigliars dal defunct hajan bandunà la chaplutta ed ils Giapunais hajan pudì guardar il maletg da Nossadunna e far fotografias. En quest lieu ed era en auters hajan els adina fatg quai cun grond respect.
1000 francs a di
Pli baud, surtut l’onn da giubileum da 2002, tschient onns suenter che Alois Carigiet è naschì, ha la stizun dal museum fatg ina gronda svieuta. Tscherts dis incassavan els 1'000 francs a di, di Dora Candinas. Oz saja la svieuta dentant pli pitschna. Els vendian tranter auter ils cudeschs d’uffants che sajan translatads en giapunais sco era in catalog cun ovras da l’artist. Ed intgins clients da l’ost rimnan schizunt crappa da la chasa paterna ch'è brischada il favrer passa.
RR actualitad 08:00