Cunzunt sin il Pass da l’Alpsu èsi ussa ruassaivel. Mo paucs autos charreschan sur il pass, ed uschia mancan era ils giasts en las ustarias. L’ustier da l’ustaria Piz Calmot, Christian Meier, quinta ch’el haja 80 fin 90% damain giasts. En il cas normal po el servir ussa la primavaira var 50 gentars durant in lavurdi da bell’aura. Ussa n'haja el prest nagins giasts. Il persunal che ha gia in contract, stoppia far vacanzas u gia retrair sururas avant ch'avair cumenzà a lavurar.
Porscher il meglier service pussaivel
Er a Sedrun sentan ils ustiers ch’ils turists dal di mancan. Josef Russi da l’hotel Cruna di, ch’i saja bler pli ruassaivel sin la via tras Sedrun che normalmain. Ses giasts infurmescha el gia ordavant che Sedrun saja cuntanschibel, e descriva las variantas per arrivar a Sedrun. Tenor Josef Russi saja quai da porscher al giast che veglia tuttina vegnir en la regiun il meglier service pussaivel. Betg auter vesa quai Curdin Brugger dal hotel Krüzli. Sco president da Mustér Sedrun Turissem ha el era pudì dir che Grischun Vacanzas, il partenari per il marketing, saja londervi da guardar, tge ch’ins pudess far sin quest sectur.
Club da golf Sedrun è main pertutgà
Era tar il Club da golf Sedrun hai actualmain paucs giugaders. Tenor il manader dal club, Seppi Joerg, saja quai dentant normal per quest temp. Sch’i duria dentant ditg, enfin che la via tranter Göschenen ed Andermatt vegn averta, haja quai dentant era consequenzas per las frequenzas dal plaz da golf. Var in quart dals commembers dal club da golf Sedrun sajan numnadamain da la Svizra centrala