Damian Tuor da Sumvitg schumbra cul Top Secret Drum Corps Basilea

Nua ch’ils schumbraders da la gruppa Top Secret sa preschentan, survegnan els applaus frenetic. Las shows dals tamburs da Basilea pretendan da mintga singul immensa concentraziun e perfecziun. Damian Tuor da Sumvitg è l’emprim Grischun che dastga schumbrar cun la gruppa da renum mundial.

Il schumbrader Damian Tuor en la citad da Edinburgh. Bild in Lightbox öffnen.

Legenda da maletgs: L’avust passà è Damian Tuor sa preschentà cun sia gruppa ad Edinburgh al Military Tattoo. ANR, S. Rothmund

Ils commembers dal Top Secret Drum Corps na ston betg mo savair schumbrar sco profis, mabain anc avair bler autras qualitads. Ed oravant tut dovri perseveranza da trenar, trenar ed anc ina giada trenar.

Shows cun bler spectachel

Alla televisiun u era live pon ins vesair las shows da questa gruppa che schumbra exact el tact, e dat tempra speziala als tocs cun bittar ad aut ils battarels, inscenar choreografias, integrar glisch u fieu e bler auter.

Bainprest puspè sin viadi

L’avust passà èn ils schumbraders da Top Secret sa participads al Military Tattoo ad Edinburgh en Scozia. Per els saja quai stà il punct culminant, ha ditg Damian Tuor che sa legra da sgular sonda proxima en l’Australia e suenter a Nova Zelanda als Military Tattoos 2016.