Ils trais piuniers dal sunar tiba a Sumvitg, Murezi Candinas, Gion Fidel Degonda e Duri Bearth, ch’è morts il 2017, han survegnì independentamain sin anniversari da lur dunnas ina tiba. Alura ha mintgin cumenzà a sunar persul senza instrucziun speziala. Svelt han Gion Fidel Degonda e Duri Bearth cumenzà a far musica communabel ed èn era sa preschentads sco duo. Pli tard è alura Murezi Candinas vegnì vitiers ed il trio ha l’onn 2000 sunà per l’emprima giada communabel a la messa da Nossadunna da la naiv en il Bogn Tenigia.
Fundà l’uniun e dublegia il dumber da sunaders
Al cumenzament da l'onn 2001 han ils trais fundaturs tegnì ina radunanza da fundaziun e gist survegnì sustegn da trais ulteriurs commembers, da Thomas Bieler, Pauli Bass e Martin Monn. Alura èn ils amaturs dal sunar tiba sa preschentads a pliras occurrenzas pli pitschnas ed a festas. Ils ultims onns è l’uniun era sa preschentada a las Festas federalas da sunar tiba e da jodlar. Ils success han laschà prosperar l’uniun, uschia ch’ella dumbra il mument nov commembers ed ina commembra. Il plaschair da sunar tiba è era anc suenter 20 onns gronds. A chaschun dal giubileum s’inscuntran las uniuns da sunar tiba sursilvanas da Sedrun fin a Flem, sonda, ils 4 da settember a Surrein per far festa.