Siglir tar il cuntegn

Surselva Dar gas da far fain

Ditg èsi stà nivlus, bletsch e fraid. Ils purs en il Grischun n'han betg pudì far savens fain. Uss cura ch’i fa finalmain bell’aura, èsi da dar gas anc pli fitg.

Legende: Video Far fain cun la famiglia Cathomen a Breil abspielen. Laufzeit 1:43 Minuten.
Or da RTR dals 19.07.2016.

La stad 2016 è crudada fin ussa pulitamain en l’aua. Quasi en tut las regiuns da la Svizra hai gia uss dà dapli plievgia che durant l’entira stad 2015. Dapi la sonda vargada dominescha dentant il sulegl il tschiel sur la Svizra. Enfin gievgia fai aura da stad en l’entira Svizra, ed uschia era en il Grischun. Blers purs han spetgà daditg sin da quest’aura stabila.

Ora cun la fautsch u megler ditg il «Mähtrac»*

Tschiel blau, sulegl e temperaturas da stad - l’aura optimala per ils purs da far fain. Uschia ch’ins vesa sin plauncas e planiras actualmain ina massa purs vi da la lavur. Quai vala era per la famiglia Cathomen a Breil en Surselva. RTR accumpogna Gaudenz ed Anita Cathomen durant l’entir di ch’els fan fain.

Pur cun plaschair.
Legenda: Gaudenz Cathomen Pur cun plaschair. RTR, Fabia Caduff
Suenter 12-15 uras da lavur sin il prà, spetga anc lavur en stalla e a chasa.
Autur: Gaudenz CathomenPur

Lungs dis da lavur, fitg lungs

Fin 15 uras è il pur Gaudenz Cathomen durant quests dis vi da segar e far fain sur Breil. Ma, i saja ina lavur che fetschia plaschair, uschia che tut na saja betg uschè nausch. Els sajan plinavant in team che enconuschia in l’auter – mintgin sappia tgi che fetschia tge. «Ma cler, cunquai che la stad è stada ditg bletscha e fraida, èsi uss da dar spezialmain gas», di Gaudenz Cathomen. Perquai sa gida perfin ses bab di per di sin las plauncas taissas sur Breil.

Ludivic Cathomen ha 83 onns e gida anc adina a far fain.
Legenda: Ludivic Cathomen ha 83 onns e gida anc adina a far fain a ses figl. RTR, Fabia Caduff
Jau gid memia gugent per pussar.
Autur: Ludivic Cathomenpur

Plain engaschi – era cun 83 onns!

Ludivic Cathomen è il bab da Gaudenz Cathomen. El ha fatg durant sia entira vita il pur, ma era anc oz giauda el da gidar ses figl durant la stad – quai cun 83 onns. Tge che manca mai tar Ludivic Cathomen è la fautsch. Uras en ed uras o taglia el la plaunca cun la fautsch.

Avant paucas emnas ha Ludivic Cathomen gì in pitschen accident cun la fautsch. El è sa tagliads vid il maun. Uss è el dentant puspè èn acziun, malgrà ch’il medì ha cusseglià da far pausa. Ma, perquai sa gidia el memia gugent, di l’um da 83 onns.

Il panorama da Breil


*Mähtrack ha per rumantsch dal reminent simplamain num «trac da segar» ;)

RR actualitad 08:00 +