Siglir tar il cuntegn
Inhalt

Surselva Dar nums a vias e numers da chasas

La confederaziun vul che las adressas vegnan armonisadas en Svizra. Quai pretenda da las vischnancas blera lavur, tranter auter cun dar nums a las vias ubain cun eruir las coordinatas dals ischs-chasa.

Leonard Cavegn e Patrick Schaniel èn davant ina charta che mussa las vias da la vischnanca
Legenda: Leonard Cavegn ed il chanzlist Patrick Schaniel davant ina charta cun las vias. Els èn en la cumissiun che ha dà ils nums a las vias ed ils numers a las chasas da la vischnanca da Sumvitg. RTR, G. Hosang

Il chantun Grischun ha lantschà 2008 sin incumbensa da la confederaziun in project che procura che tut las vias survegnan nums e las chasas in numer.

L’idea da quai è che las adressas en Svizra vegnan armonisadas e che mintga chasa nua che persunas vivan ni lavuran ha ina adressa ch’ins sa buc sbagliar. Quai per che la posta u era organisaziuns da glisch blaua, mo era glieud privata chattian pli tgunsch las adressas. Uschia han ins cumenzà a Sumvitg l’onn passà cun questa lavur e quinta da terminar la lavur mez da quest onn.

Eruir coordinatas dals ischs chasa

Sper il dar num a las vias e numers a las chasas vul la confederaziun era ch’i vegnia eruì las coordinatas da las entradas da chasas. Quai vegn fatg per che ils indrizs da navigaziun han era l’infurmaziun sin tge vart da la chasa ch’i han da manar l’automobilist u il peduns.

Tant las coordinatas da las entradas, sco era ils nums da vias e la numeraziun da las chasas duain esser tschiffadas en il Grischun enfin la fin 2017. Tenor l’ Uffizi d'agricultura e da geoinfurmaziun ha la mesadad da las vischnancas han gia fatg quai, in quart è actualmain londervi ed in quart so anc far quai.