Siglir tar il cuntegn

Surselva «Das Experiment» a Falera

La 6avla ediziun da l’emissiun «Das Experiment» da SRF vegn actualmain filmada a Falera e conturn. Per la primaa giada dorma la gruppa l'entir temp en il medem lieu, numnadamain en il Parc la Mutta en il guaud davos la baselgia da S. Remigius.

Il champ, ubain plitost la tauna da durmir dals participants.
Legenda: Il champ, ubain plitost la tauna da durmir dals participants. RTR, C. Albin

Chattar in lieu da star sur notg adattà per ils participants da l'emissiun «Das Experiment» saja adina grev. Tenor Björn Hering, il producent da l'emissiun, stoppia quest lieu esser lunsch davent da la civilisaziun dentant era fitg datiers da quella.

Champ permanent pervia da la chatscha

Pervia da la chatscha ha Björn Hering decidì ch'ils participants dormian tut ils 10 dis en il medem lieu. Durmir mintga notg en in auter lieu sco durant las ultimas 5 ediziuns da l'emissiun na fiss betg stà pussaivel.

«Las restricziuns durant il filmar fissan stadas memia grondas e nus n'avain betg vulì disturbar ils chatschaders.», uschia Hering. Ina buna enclegientscha cun ils indigens è fitg impurtanta per il producent. Filmar durant in auter temps da l’onn n’è betg vegnì en dumonda.

Björn Hering davant il champ da durmir permanent dals participants da Das Experiment.
Legenda: Björn Hering davant il champ da durmir permanent dals participants da Das Experiment. RTR, C. Albin

Era vinavant cun in champ permanent

Las experientschas fatgas cun in champ permanent sajan fitg bunas. I mussia in nov aspect fitg interessant da la gruppa. Ord quest motiv vegn Björn Hering probablamain a planisar vinavant in champ da durmir permanent per ils participants, era durant las proximas ediziuns da «Das Experiment».