La KORA (Post da perscrutaziun per l'ecologia dals animals da rapina e per il management dals animals selvadis) analisescha il dumber dals animals da rapina per incumbensa da la Confederaziun. Tar quests animals da rapina gronds tutga er il luf-tscherver.
Cifras e fatgs
En Svizra vivan tenor la calculaziun approximativa la pli actuala circa 340 lufs-tscherver. L'onn 2021 èn vegnids dumbrads 14 lufs-tscherver en Surselva. Qua vegnan quintads mo ils lufs-tscherver creschids, perquai ch'ils animals giuvens han in'auta mortalitad e perquai che l'effectiv vegniss survalità eventualmain.
Ils resultats dal monitoring actual vegnan publitgads il pli baud l'atun.
Il monitoring
La KORA ha l'incumbensa da stimar il dumber dals lufs-tscherver en Svizra. Quai fa ella cun agid da territoris da referenza che vegnan fixads sin basa da la cuntrada. Territoris ch'èn per gronda part isolads tras chadainas da muntognas, flums u autostradas, uschia ch'ils lufs-tscherver na pon betg mitschar u entrar durant il monitoring. In tal territori da referenza porta il num Surselva, er sch'il territori va atgnamain davent dal pass da l'Alpsu fin a Cuira ed a Tusaun. Sur quest territori sa cumpona in raster da quadrats da 2.5km. En mintga quadrat vegn fixà in punct fotografic che consista mintgamai da duas cameras da selvischina visavi.
Durant 60 dis èn las cameras stadas en acziun en la Surselva. (Cun «Surselva» manegia la KORA il territori davent dal pass da l'Alpsu fin a Cuira e cun Tusaun) La KORA schazegia ch'i haja dà radund 10'000 maletgs che ston ussa tuts vegnir evaluads. En in emprim pass vegnan ils maletgs cun autos e persunas stizzads automaticamain d'intelligenza artifiziala. Suenter cumenza Ursula Sterrer, la manadra dal monitoring dals lufs-tscherver tar la KORA, ad evaluar ils maletgs cun agid da glieud dal servetsch civil e da praticants. Mintga luf-tscherver sto vegnir determinà cun agid da ses pail unic, per ch'in luf-tscherver ch'è vegnì fotografà pliras giadas na vegnia betg dumbrà duas giadas.