Amez Breil en in iert d'in chalet stattan els; plirs spierts cun in surrir inquietond che paran da sgulatschar, skelets en tuttas grondezzas che sautan sin lur fossas, e sin il balcun stat la mort cun la fautsch enta mauns che guarda cun ina egliada smanatschanta vers via.
Responsabel per questa cumposiziun plitost extraordinaria per nossas regiuns è Przemyslaw Molski. Oriund da la Pologna, ha el vivì per otg onns en la Germania. Dapi l'avust viva l'um da 35 onns a Breil, quai per lavurar sco tgirunz en la chasa da vegls a Trun.
Malgrà ch'el e pir qua dapi prest trais mais na vuleva el betg desister sin sia gronda passiun ch'el ha dapi plirs onns.
Mintga carstgaun dovra in hobi – intgins baivan, intgins fiman e l'auter è oramai in «Halloweenfreak».
Sia dunna Monika e ses figl Krzysztof (15 onns) sustegnan Przemyslaw Molski tar las installaziuns da las figuras per part pulit grondas. Dapi bun in mais bajegian els si ina figura suenter l'autra, collian ellas tut tenor cun la forza electrica e qua e là dovri er reparaziuns.
Quai è insatge spezial ed ina attracziun nunditga per Breil.
Tar vischinas e passants chaschuna la decoraziun mintgamai per attenziun e marveglias.
Igl è forsa schon in zic surfatg.
Il urden per decorar ha Przemyslaw Molski ramassà sur plirs onns. Per cletg haja el avunda spazi en sia chasa per magasinar la rauba, di el cun in surrir. Quant che tut las figuras han custà en total, quai restia in secret, agiunta el.
-
Bild 1 von 7. Na vuless ins atgnamain pli gugent betg avair sin balcun; la mort. Bildquelle: RTR.
-
Bild 2 von 7. Ina cumpagnia che fa sgarschur. Bildquelle: RTR.
-
Bild 3 von 7. Tegna en egl mintga detagl; il amatur da decoraziun oriund da la Pologna Przemyslaw Molski. Bildquelle: RTR.
-
Bild 4 von 7. Las lavurs d'installar l'urden da decoraziun cuzzan dapi bundant in mais. Bildquelle: RTR.
-
Bild 5 von 7. Las zitgas cun fatschas rientas, probabel il classicher tranter las decoraziuns da Halloween. Bildquelle: RTR.
-
Bild 6 von 7. Passantas e passants stettian savens airi per contemplar la decoraziun. Cunzunt uffants hajan plaschair vi da las figuras dal tut differentas. Bildquelle: RTR.
-
Bild 7 von 7. Bildquelle: RTR.
Ma sia passiun per decorar na paussia betg suenter la festa da Halloween. El veglia – sco gia ils ultims onns en la Germania – er decorar la chasa a Breil a la gronda per Pasca e Nadal.
Per Nadal haja el gia in tschert plan davart che ch'el vuless bajegiar si, ma da quai na vul el anc betg tradir memia bler, uschia ch'i dettia ina surpraisa per las passantas ed ils passants en il vitg da Breil.