A la radunanza communala dal venderdi saira han ils da Schluein approvà in credit da 150'000 francs per sanar la deflussiun en la Val Schluein. Gia garantidas èn las subvenziuns da la Confederaziun e dal chantun che muntan a 76% dals custs totals. Ils custs restants vegnan repartids sin las vischnancas da Schluein (70%), Falera (25%) e Glion (5%). Previs èsi da far las lavurs durant la stad e l'atun da quest onn.
La deflussiun ch'è vegnida construida ils 1970 mussa divers deficits. Oravant tut èn ils bischens memia pitschens e chaschunan uschia lingias stuppadas. La deflussiun perda uschia ses effect ed il terren è per consequenza bletsch ed instabil. Ils bischens vegnan perquai remplazzads cun bischens pli gronds ed ultra da quai vegnan construids tumbins da controlla supplementars.
Plinavant ha la radunanza communala approvà la lescha davart il provediment d'aua.
RR novitads 06:00