Glion gudogna
Ord vista da Glion è in plus da 400 persunas bel da vesair. Quai creschament sa reparta sin pliras fracziuns e sur ils davos 8 onns dapi la fusiun. Uschia èn la citad da Glion, Castrisch, Sevgein, Luven, Schnaus e Rueun quels che han procurà per quai plus. Las fracziuns da Duin, Pitasch, Riein, Ruschein, Ladir, Siat, e Pigniu èn restads quasi airi u èn ids enavos levamain.
Nossa finamira è da tegnair quest dumber d'abitants en quellas fracziuns pitschnas, quai munta che la qualitad da l'infrastructura sto vegnir mantegnida per quels ch'èn gia la.
Lumnezia perda
La Lumnezia ha 120 abitants pli pauc entaifer 9 onns. Questa digren fa quitads a Daniel Solèr, il president da vischnanca da la Lumnezia. In recept encunter quella digren ha el betg en satg.
Far pass pitschens, ed acceptar che la demografia resta forza anc in temp in fatg.
Tar quels pass pitschens quinta Daniel Solèr era la situaziun durant e forsa era suenter la pandemia da corona. Uschia saja vegnida dapli glieud en Lumnezia en tschertga da ruaus e solitariadad. Las parcellas da bajegiar hajan ins pudì vender uschè bain sco anc mai.
Bandunar la Lumnezia en direcziun Glion
La famiglia Camenisch da Surcasti ha bandunà la Lumnezia avant intgins onns ed è sa chasada a Glion. Lur fegl ha surpiglià la chasa en Lumnezia e quai haja levgià ad els da far quest pass.
Alexa Caduff ha in'abitaziun a Glion, ma ella na leva betg prender dimora permanenta a Glion. Pli gugent fiss ella stada mo durant l'emna a Glion. Quai n'ha la vischnanca da Glion dentant betg acceptà. Fin uss na saveva ella betg ir mintga saira a chasa en Lumnezia. Quai vul ella ussa midar ed uschia è ella s'annunziada da far il permis dad ir cun auto. Sche quai gartegia, avessi lura num Lumnezia plus ina e Glion minus in'abitanta.