La situaziun è difficila. La deponia a Raveras porscha la pussaivladad da trair davent rument a moda nuncumplitgada. Uschia na datti nagina stadaira e fin avant curt pudevan ins quasi dismetter tut. Quai saja anc adina il cas, tut il rument bloccant, ma era fier e las chaussas che vegnan rimnadas, sco palpiri e chartun po anc adina vegnir deponì. Tge ch’è sa midà, saja ch’ins veglia uss betg pli material da construcziun pli a Raveras, di il suprastant Paul Schmidt. Quai na fissi era mai stà lubì, ma ils ultims onns hajan ins tolerà quai e lura saja quai sa sviluppà tar la pratica usitada.
Corona sco motor
La situaziun saja vegnida pli precara era suenter che blers hajan cumenzà a renovar lur objects durant il temp da pandemia, di Paul Schmidt. Ma betg sulet quai haja la finala procurà per la midada. Surtut il problem ch’ils custs èn bler pli auts che las entradas è il motiv principal per controllar in zic pli sever.
Turissem da rument
Era il turissem da rument saja in fenomen ch’els possian observar. Uschia vegnia adina puspè persunas cun numbras d’autos dad auters chantuns per dismetter lur rument bloccant. Quai na saja nagin problem, sche quellas persunas hajan in'abitaziun en vischnanca e pajan era taxas. Ma els na possian betg controllar quai e far da policist na saja betg il pensum dal lavurer communal ch’administrescha la deponia en in turnus, di Paul Schmidt. Ma els sappian ch’era persunas da vischnancas vischinas fetschian il viadi fin a Mustér per dismetter lur rument.
Dapli temp d’avertura
Per pudair porscher ina plivalur a las vischinas ed als vischins, hajan ins uss avert la deponia a Raveras quasi mintgadi. Tut la rauba che na custa la vischnanca nagut da dismetter, po vegnir deponida mintgadi al lieu, di Paul Schmidt. Uschia possian els evitar colonnas la sonda e la mesemna, ma era porscher ina plivalur. Ins stoppia uss observar co quai funcziunia, ma la gonda part da las vischinas ed ils vischinas sa cumporta correct. E quai saja lur devisa, da pussibilitar als 98% da la populaziun che sa cumporta correct ina plivalur e betg laschar dictar da las nursas nairas, di Paul Schmidt.
Nova lescha, novas pussaivladads
Il mument saja ina cumissiun vida elavurar ina nova lescha per la vischnanca. En quella saja alura era previs d’avair pussaivladads d'adattar las taxas. Quellas sajan il mument fixadas e na possian betg vegnir augmentadas. Ils ultims onns hajan ins uschia gì relativ bassas taxas, ma ils custs per la vischnanca creschian. Uschia na va il quint betg si e cun la lescha nova possian ins far quella adattaziun. La lescha duai vegnir preschentada l’onn proxim en il cussegl da vischnanca. Era planisà è d'investir en la deponia a Raveras e far ella anc pli pratica, ma era pli rentabla per la vischnanca, accentuescha Paul Schmidt.