Las 14 deputadas e deputads da la Surselva pretendan in tact da mes'ura da la viafier tranter Cuira ed Andermatt. En in manifest che vegn surdà l’emna che vegn a la regenza giavischan els era meglieraments tar las colliaziuns sur il Pass dal Lucmagn e tar l'infrastructura da vias.
La delegaziun sursilvana en il Cussegl grond fa quitads pervia da la demografia negativa: «Quella maina ad ina spirala negativa en l’economia e la societad.» La politica stoppia intervegnir. Ina pussaivladad per impedir che vitgs e vals sa svidian, vesan las deputadas ed ils deputads en meglras colliaziuns dal traffic public surtut cun Cuira, ma lura er cun Andermatt. Bunas colliaziuns cun Andermatt hajan in grond potenzial turistic.
Ma era ils vitgs e las valladas a la periferia duajan vegnir colliads meglier – en temps da chatsch medemamain cun in tact da mes'ura dals autos da posta. Colliaziuns da bus l'entir onn ora pretendan las deputadas ed ils deputads era sur il Lucmagn.
Il manifest dals deputads vegn inoltrà en connex cun il tractament dal rapport davart la construcziun da vias e davart il program da construcziun da vias 2021 – 2024 en il parlament chantunal. E part da quel manifest fan era pretensiuns pertutgant infrastructura da vias e dal traffic plaun.
