L'uniun chantunala da chatschaders ha fatg in appel en il «Fegl ufficial dalla Surselva» da betg ir a tschertgar cornas ed uschia dar il ruaus che la selvaschina dovra suenter quest enviern sever. Il guardiaselvaschina Arnold Caminada beneventa quest appel. Er sche la naiv fiss davent immediatamain, fiss la selvaschina anc adina fitg flaivla. Ella dovria anc intgins mais da sa revegnir dals strapatschs da l'enviern passà declera el.
I po avair consequenzas
Ir per ils guauds enturn per tschertgar cornas disturbia. La selvaschina vegnia stgatschada e quai possia esser la sentenza da mort per ella. Sch'insatgi vegnia traplà durant il tschertgar cornas dettia quai ina tgisa, di Arnold Caminada. Sch'insatgi chattia tar ina spassegiada sin ina senda da viandar u via da funs ina corna, lura possia el dentant prender quella senza avair tema ch'i dettia ina tgisa.
RR actualitad 12:00