Ils 21 da favrer è il di da la lingua materna. L'instituziun internaziunala UNESCO aveva inizià quai di l'onn 2000. La finamira da quest di è da promover la diversitad linguistica. Radund 7000 linguas vegnan discurridas oz activamain. La mesadad da quellas è dentant en privel da murir ora. Il di è tranter auter era deditgà a tuttas persunas che vivan en l'exteriur e n'han betg la pussaivladad da discurrer savens l'atgna lingua.
Rumantsch, albanais, tudestg, tirc
Eder Lala (36) vegn da l'Albania. L'albanais è era stà l'emprima lingua ch'el ha emprendì. Cun 8 onns è el lura vegnì en Svizra ed abitava cun ses geniturs a Danis. Là è el vegnì confruntà cun in ulteriura lingua: il rumantsch. Tenor Eder Lala haja el gì paucs problems cun emprender rumantsch. Il rumantsch haja numnadamain per part sumegliants pleds. Il tudestg è alura vegnì automaticamain vitiers cun ils onns. Sia dunna è dal Cosovo, discurra però tirc. Uschia è quai anc ina lingua supplementara en il mintgadi dal trenader da fitness.
Pliras linguas mamma
Sco Eder Lala declera, haja el pliras linguas mamma. L'albanais collia el cun sias ragischs e sia derivanza. Il rumantsch percunter è collià a bellas regurdientschas da l'uffanza. Uschia sajan omaduas linguas fitg impurtantas per il bab da 2 uffants. El patratgia era en tut las linguas. Plinavant n'ha el betg tema ch'ina da ses linguas giajan a perder. El ha numnadamain avunda contact cun parentella che discurra omaduas linguas.
RR actualitad 11:00