Ils 19 da mars è in di spezial – igl è il di dal son Giusep. Ils Giuseps e las Giuseppas u Giuseppinas festiveschan pia lur di dal num. En Surselva datti schizunt in'uniun da Giuseps e Giuseppas a Tujetsch, Trun e Mustér. Els sa rimnan a Darvella per festivar l'occasiun speziala en la chaplutta s. Giusep – per far onur al son e suenter passentar ina bella saira en cuminanza.
Sco bab nutrider da Jesus e part da la famiglia sontga ha il son Giusep ina rolla speziala tranter ils sontgs en la baselgia catolica. En il Grischun han 12 baselgias son Giusep sco patrun. Tschertas vischnancas catolicas da la Cadi fan firà per celebrar il son cun in servetsch divin.
Uniun da Giuseppas e Giuseps tuatschina sa schlia
En Tujetsch è sa furmada il 1987 in'uniun da Giuseppas a Giuseps. Quella dumbrava a l’entschatta radund 100 commembras e commembers. Els hajan mintgamai fatg ina messa il di da son Giusep a Bugnei en la chaplutta deditgada al son. Alura hajan els tegnì la radunanza generala, e pli tard sajan tuts stads da cumpagnia e giudì in gentar, declera Alfons Giusep Demund.
El ha surpiglià avant paucs onns il presidi ed ils documents da l’uniun, perquai ins n’ha betg pli chattà persunas che vulevan far quellas incumbensas. Ed uss sajan els propi vegnids a la conclusiun da schliar l’uniun e da giudair anc in ultim gentar da ventschidas, accentuescha Alfons Giusep Demund. In ulteriur motiv è era, che adina pli paucs geniturs tschernan il num Giusep per lur uffants. Uschia vegn il num probabel a murir ora ils proxims onns.
Or da l'archiv:
L'onn 2017 han ils Cuntrasts dà in sguard pli detaglià sin il son Giusep, sias rollas e sias differentas muntadas en la baselgia catolica.