Ils museums sin l’entir mund han avert la dumengia las portas a chaschun dal di internaziunal dals museums. Era il pitschen museum dal «Meister da Vuorz». In museum che po festivar il giubileum da 10 onns e che celebrescha il grond pictur artist dal temp medieval. Sia pli impurtanta ovra sa chatta a Vuorz, perquai ha quai pictur nunenconuschent survegnì ses num. En ulteriurs 13 lieus en il chantun Grischun sa chattan era fastizs dal pictur artist, per exempel a Razén.
Malegiar sez sco il meister
Ina purschida ch’il museum porscha è l’atelier da colurs. Uschia pon tuts sez malegiar cun colurs sumegliantas al pictur istoric. Surtut ils uffants malegian gugent, ils creschids n’hajan savens betg il curaschi, uschia Guido Dietrich, il manader dal museum. El sez è era fascinà surtut da las colurs e da la mimica dals maletgs en la baselgia da Vuorz. En l’istorgia d’art ha il «Meister da Vuorz» ina gronda impurtanza. Uschia vala el sco in dals gronds picturs artists dal temp medieval en il nord da las Alps. Quai attira era persunas or da l’entir mund en il pitschen vitg en Surselva, quai possian ins vesair en il cudesch dad osps en baselgia ed era la dumengia era in um da l’Australia a Vuorz per admirar l’art medieval.
Pliras purschidas era dal mund medieval
Il museum dal «Meister da Vuorz» sa participescha cun 10 ulteriurs museums en il Grischun al mund medieval, «Mittelalterwelt». La stad datti perquai pliras purschidas, tranter auter a Cuira en il museum Retic, ma era la finala en il museum «Meister da Vuorz».
Or da l'archiv
