La scrinaria Flepp a Mustér ha emploià Valid Amiri sco lavurer gidanter. Quai saja sa cumprovà fitg bain, il giuven um da 28 onns saja fitg attent ed engaschà, ha ditg il possessur da la scrinaria, Victor Flepp. In dals giavischs da l'um da l'Afghanistan è da far in emprendissadi sco scrinari. Era qua vul la scrinaria Flepp porscher maun ed almain examinar, tge ch’è necessari per pudair far in tal emprendissadi. Cun in dals emprims pass, emprender la lingua tudestga, ha Valid Amiri gia cumenzà intensiv, quai saja necessari per sa conversar cun las persunas qua, ma surtut per pudair frequentar ina scola, di Valid Amiri.
Lung viadi da fugia
Valid Amiri ha stuì fugir ord l'Afghanistan pervi da la guerra. El è creschi si datiers da la citad Kundus, nua che la milissa dals Talibans aveva il 2015 conquistà danovamain la citad e commess crims da guerra. Da l'Afghanistan è Valid Amiri fugì en l’Iran, da là en Tirchia e sur la mar en Grezia. Da la Grezia è el fugì cun ina gruppa via la Serbia e l’Ungaria, fin l’Austria e da là en Svizra.
Arrivà en Svizra è el vegnì staziunà en il Grischun e la finala sin il Pass dal Lucmagn en il center d’asil temporar. L’emprim ha Valid Amiri survegnì ina decisiun negativa ed ha uschia stuì temair passa in onn ch’el stoppia bandunar la Svizra e returnar en ses pajais d’origin. Ma suenter bun in onn han las autoritads renconuschì Valid Amiri sco fugitiv temporarmain recepì ed el ha survegnì in permiss da dimora F.
Lavur e vita normala
Viver e lavurar sco tut ils umans en pasch e cuntentientscha, quai saja sia finamira, ma era da tut ils umans, ha ditg Valid Amiri. Uschia speria el, ch’el possia far ses emprendissadi ed uschia pussibilitar a sasez in futur en Svizra. In da ses gronds siemis saja da prender si'amia, che viva il mument en l’Iran, tar el en Svizra.
RR actualitad 07:00