A Disla ha l’Uniun Fallun e Chascharia Disla renovà ils ultims onns in mulin ch’è vegnì construì avant pli che 100 onns. Cun blera lavur e grondas investiziuns han las commembras ed ils commembers dà nova vita a quai mulin.
Il mulin era vegnì donnegià d’ina lingia d’aua rutta ed ha stuì vegnir demontà cumplettamain per savair far las lavurs da restauraziun. Uss èsi puspè pussibel da mular graun cun quai mulin.
Mulin, fallun, resgia e chascharia
Dasperas ha l’uniun era restaurà in fallun, ina resgia ed ina chascharia a Disla. Tut quai per mantegnair la savida, co ch'ils babuns resgiavan laina ni mulavan graun per far farina, e quai mo cun la forza d’aua.
Tenor il president da l’uniun, Felici Deflorin, sajan tut quellas installaziuns vegnidas messas en funcziun cun rodas d’aua. A Disla existivan ina giada sis rodas d’aua.
In motor electric gida uss al mulin d'aua
Tut quellas rodas nizzegiavan l’aua dal dutg che maina tras Disla. Ozendi na saja quai dentant betg pli pussibel perquai ch'il dutg haja memia pauc’aua. Perquai haja l’uniun installà in motor electric per far ir il mulin ed era planisà in motor electric per la resgia.
Per Felici Deflorin in cumpromiss acceptabel, perquai ch’i saja pli impurtant da mantegnair quella savida che da vulair restaurar per tut pretsch en moda istorica correcta tut quels indrizs.
RR actualitad 11:40