Siglir tar il cuntegn

Header

audio
La disciplina per restar saun
Or da Actualitad dals 14.11.2022. Bild: RTR
laschar ir. Durada: 3 minutas 48 Secundas.
cuntegn

Diabetes Ina malsogna che pretenda disciplina

Dapi che Geni Albin ha 29 onns viva el cun diabetes tip 1. Era sche la malsogna è ina part da sia vita e pretenda mintga di disciplina, veglia el viver uschè normal sco pussaivel e betg sa laschar influenzar memia fitg dal zutger.

L'onn 1981 ha Geni Albin survegnì la diagnosa diabetes tip 1. Cumenzà hai cun sintoms da gronda said e disturbis da la vesida. Da quel temp aveva el 29 onns. Dapi lura sto el mesirar pliras giadas a di il zutger dal sang e sprizzar insulin. Pli baud ha el stuì dar sez las squittas quatter giadas per di. Dapi intgin temp ha el la pumpa d'insulin e na sto betg pli squittar sez. A l'entschatta saja stà difficil d'ir enturn cun la malsogna. Oravant tut durant l'emprim mez onn saja stada ina midada immensa per el perquai che la malsogna haja pretendì l'entschatta blera pazienza e disciplina.

Ins vesa in pachet da squittas dad insulin e l'apparat ch'è collià cun la pumpa d'insulin
Legenda: Squittas d'insulin e l'apparat ch'è collià cun la pumpa. RTR, Anna Tuor

Malsogna che pretenda disciplina

Disciplina dovra quai surtut cun mesirar regularmain il sang e cun dar las squittas. Ma disciplina munta anc bler dapli per in diabeticher: Geni Albin ha pli baud adina stuì levar il medem temp ed adina mangiar il medem temp. E sia tschavera ha el adina stuì pasar l'emprim.

Jau sun stà quel che ha adina ditg che jau less viver mia vita e betg viver cun il zutger.
Autur: Geni Albin diabeticher

Uss na sto el betg pli pasar sias tschaveras. Cun il temp n'haja el er betg pli stuì mesirar permanentamain ses zutger da sang. Insacura enconusch'ins fitg bain ses corp, e lura sent'ins era tge ch'ins dovra.

Nua ch'ins stoppia er sentir fitg bain ses corp, saja en il sport. Ed il sport saja adina stà insatge fitg impurtant per Geni Albin. Per in diabeticher è il sport fitg bun perquai ch'el tegna pli bass il zutger da sang.

Il sport è in grond ami ed il moviment è il meglier ch'in diabeticher po avair.
Autur: Geni Albin diabeticher

En il sport stoppian ins dentant far adatg spezialmain e tadlar fitg bain sin ses corp. Sch'ins fa ina giada memia bler e sch'ins na tegna betg en egl il zutger, èsi bun pussaivel ch'il zutger è memia bass e ch'ins perda la schientscha. E lura daventi privlus. Perquai sto Geni Albin adina avair cun el in zutger, tar il sport sco era en il mintgadi.

Fatgs e cifras davart diabetes

Avrir la box Serrar la box
  • 500'000 persunas en Svizra han diabetes, pia 5,7% da la populaziun.
  • Ils pli impurtants tips da diabetes èn tip 1 e tip 2.
  • La gronda maioritad da passa 90% han il tip 2. Quel vegn da surpaisa e mancanza da moviment.
  • Il tip 1 è bler pli rar e sa mussa normalmain avant ch'ins ha 30 onns.
audio
Intgins facts da diabetes
ord Actualitad dals 14.11.2022. Bild: Keystone
laschar ir. Durada: 3 minutas 39 Secundas.

Cun la diagnosa diabetes tip 1 è Geni Albin dependent d'insulin sia entira vita. I na dat fin ussa nagina guariziun cumpletta. La malsogna ha dentant dà ad el la schanza da pudair emprender d'enconuscher fitg bain sa sez e ses corp ed haja er dà l'abilitad ad el da sentir sch'i na va betg bain cun auters umans.

Or da l'archiv:

video
Anouk viva cun diabetes
Or da Minisguard dals 13.11.2021.
laschar ir. Durada: 3 minutas 56 Secundas.

RTR actualitad 12:00

Artitgels legids il pli savens

Scrollar a sanestra Scrollar a dretga