Blers detagls
En la discussiun èsi vegni discutà bler da detagls. Thomas Buchli ha ditg ch’el haja il label dal Parc Beverin. El ha punctuà che mintgin stoppia far sez insatge, respectiv vegnir cun ideas. Il parc saja in agid per realisar projects.
Da la medema opiniun è stà Peter Binz. I dependia da nus e da nossas vischnancas, tge che nus faschain cun quest parc. I dettia in contract da diesch onns ed ins duess gughegiar quest experiment.
E Sep Benedetg Candinas ha ditg, ch’ils avantatgs dal parc sajan pli gronds ch’ils dischavantatgs; e suenter ch’el haja legì il contract dal parc saja el persvadì pli che mai.
Leo Tuor ha numnà plirs exempels ord la Charta. In pertutgia la Chamona dal Terri. El na chapeschia betg pertge che questa chamona n’a saja betg en la zona da coc. Uschia vegnissan blers en questa chamona, ed autras avessan pli paucs giasts. Plinavant ha el crititgà, che las nursas na pudessan betg pli pascular en la Greina ubain sin ils auts.
Werner Degonda ha fatg quitads per la selvaschina, perquai che quella n'haja nagina lobi.
Jon Peider Lemm ha fatg attent – era en connex cun il Parc Naziunal en l’Engiadina – ch’ins na dastgia betg spetgar bler d’in parc.
Prender encunter arguments
Da las ca. 200 persunas preschentas han mo paucas prendì posiziun. Peter Binz ha dentant ditg ch’els vegnian a prender encunter ils arguments e guardar, tge ch’els possian resguardar en il contract dal Parc Adulà. La procedura da consultaziun cuzza fin la fin da schaner. Part da la discussiun al podium han fatg:
Pro parc
- Peter Binz (president communal da Medel)
- Thomas Buchli (president communal da la vischnanca Val Stussavgia)
- Sep Benedetg Candinas (pur da Sumvitg)
Contra parc
- Leo Tuor (scriptur)
- Werner Degonda (guardiaselvaschina)
- Jon Peider Lemm (anteriur president communal da S-chanf)