La societad Prime Elements n'ha vul anc betg prender posiziun en connex cun la sentenzia, ha ditg in dals responsabels sin dumonda da RTR. Era la vischnanca da Tujetsch vul il mument spetgar, entant sajan ins cuntent cun la decisiun da la Dretgira administrativa, ha ditg il president communal Beat Röschlin.
Nagina prolungaziun da la lubientscha da construcziun
La societad dal chantun Zug aveva cumprà il 2012 l’anteriur hotel Alpsu a Sedrun e stgarpà giu quel. Suenter che las lavurs da construcziun avevan cumenzà il 2016 eran quellas vegnidas sistidas pervi da mancanza da daners. Suenter che la vischnanca aveva pliras giadas prolungà la lubientscha da bajegiar n’aveva ella la primavaira passada betg pli fatg quai.
Interess public avant interess economic
La dretgira argumentescha sia decisiun da refusar il recurs da Prime Elements cun quai che l'interpresa haja ussa gia gì passa tschintg onns temp per bajegiar il project planisà a Tujetsch. Plinavant stettia er l'interess public en il center. L'interess public haja precedenza avant l'interess economic da la Prime Elements, dad anc ina giada prolungar ina lubientscha da bajegiar che na vegnia tut tenor puspè betg duvrada e saja cun quai dispitaivla.
Dà lubientscha memia baud
La Prime Elements ha plinavant argumentà che la vischnanca haja dà ad els memia baud la lubientscha da bajegiar. Da quest temp na saja la planisaziun anc betg stada substanziala avunda. La dretgira ha dentant decidì che quai saja stà en l'interess da la Prime Elements. Els avevan numnadamain survegnì la lubientscha il december 2012. Pia curt avant che l'iniziativa cunter abitaziuns secundaras è vegnida realisada. Quai saja stà en l'interess da la Prime Elements, perquai ch'in tal project na fiss suenter l'iniziativa betg pli stà realisabel.
RR novitads 15:00
