Ellas hajan adina legì istorgias e guardà films da fantasia, dian las duas giuvnas che van a la scola chantunala. Perquai sajan ellas sa decididas da scriver in roman. I saja stà grev da tegnair atras, mo en duas saja quai ì bain. Problems n'haja quai mai dà, Stina Hendry.
Project da la «Scola superiura Lumnezia»
Quai ch’è daventa in cudesch da quasi 350 paginas ha cumenzà sco project a la «Scola superiura Lumnezia». La scolasta Carin Cadruvi aveva dà l’incumbensa als scolars da l’emprima secundara da scriver ina istorgia da 30 paginas. Sco ella ha ditg ad RTR, n'avevan las duas scolaras betg finì l’istorgia.
I vegnevi ideas ed ideas, ed uschè saja l’idea naschida da far in cudesch tar la «Chasa Editura Rumantscha» (CER). Ella possia mo smirvegliar, tge fantasia che las duas scolaras hajan gì.
Gronda premura
Sco quai che Anita Capaul da la CER ha ditg sonda a la vernissascha a Vella, dovria quai gronda premura e perseveranza da scriver in tal cudesch. Stina Hendry e Flurina Albin han plaschair dal resultat. I saja in sentiment grondius.
RR actualitad bunura 06:00