Ina summa exacta è vegnida preschentada a quels da Suraua. Numnadamain bunamain 90'000 francs ad onn giessan a perder a las plaivs lumnezianas, sch'ellas na fusiuneschan betg.
Il process da fusiunar ha dentant gia entschet avant quatter onns en Lumnezia. Lura han las plaivs da Suraua fusiunà, ed avant dus onns en las trais plaivs da Degen, Vignogn e Vella sa collaidas tar la plaiv Lumnezia amez.
Morissen va in'autra via
Per las autras tschintg plaivs en Lumnezia fissi atgnamain era stà previs da fusiunar ed uschia simplamain furmar la segunda plaiv en Lumnezia. Mo dapi in onn va Morissen in' autra via e decida gia l’autra emna sur d’ina fusiun cun la plaiv Lumnezia amez. Restan pia las quatter plaivs Vrin, Lumbrein, Cumbel e Suraua. Questas quatter plaivs en dentant tratgas geograficamain ina ord l’autra bravamain: duas entadim la Lumnezia e duas oradim la Lumnezia.
La Plaiv da Suraua è vegnida orientada sco emprima sur dals plans da fusiun.
Ils da Suraua giavischan e pon senz' auter s’imaginar ina fusiun. Els giavischan dentant che las chartas vegnan anc ina giada maschadadas. Quai vul dir, ch'els san ch’i dovra duas plaivs per pudair retrair il maximum dal sustegniment dal corpus catholicum. Mo els giavischan che la Lumnezia vegnia partida si en Lumnezia entadim e Lumnezia dador.
Sin 2018 tanscha era
Quai munta che las fusiuns gest fatgas en la Lumnezia amez stuessan vegnir reponderadas. Il project ch'è ussa elavurà cun Vrin, Lumbrein, Cumbel e Suraua vala mo sco sboz e sto vegnir surlavurà. Era èn ils da Suraua da l'opiniun che la fusiun na fetschia betg tanta prescha. I stoppia betg esser fusiunà gia sin il 2017, era quai proponan ils da Suraua da far in pau pli bufatg. 2018 tanscha era, è sta d’udir da pliras varts.
Il maraton d’orientaziun per questa fusiun va enavant. Proximamain vegnan ils da Vrin, Lumbrein e Cumbel orientads e pon prender posiziun, sch'els vulan persequitar enavant ina fusiun da las plaivs.