Sep Andriu Monn è plitost in um ruassaivel e per sai, ton pli hai duvrà intgina persvasiun per ch'el saja pront da dar ina intervista sur da sia lavur ch'el ha fatg durant 55 onns. Uschè ditg è el numnadamain sta ubain caluster, chavafossas, u era gidanter en la baselgia e per la societad da Tujetsch.
Bleras midadas sur ils onns
Blera saja sa mida, di l'um ch'ha era adina fatg da pur. Pli baud aveva el dapli lavur en e sper la baselgia. Las baselgias eran plainas ed ils augsegners restavan onns en il vitg. Ussa saja bler daventà pli malsegir ed il caluster stoppia savens era sa gidar cun las lavurs vid la messa. Quai na saja betg adina stà simpel. Il pli gugent haja el gì las festas, preparar tut per quels dis e silsuenter era pudair sunar en la musica dal vitg. Era en quella ha el sunà activamain pli che 50 onns.
Durant decennis ha Sep Andriu Monn era chavà las fossas a Sedrun. Passa 500 sajan quai stadas. Ina lavur ch'el ha fatg ils emprims onns tut a maun e quai da tutt'aura. Là haja bain dà situaziuns fitg grevas. Quella lavur haja el dentant adina resentì sco in servetsch a la societad – in ch'el haja pudì far tut quels onns.
Tut en tut haja el gì bleras e bellas uras, di Sep Andriu Monn. El sa legra dentant uss er da pudair surdar las lavurs en auters mauns.