Dus camps da trenament èn avunda

US Schluein Glion tira in bilantscha positiva dal camp da trenament da l’equipa da l’Austria. Dapli che dus camps per on n’èn dentant betg giavischà.

Il team austriac durant in trenament. Bild in Lightbox öffnen.

Legenda da maletgs: Il team austriac durant in trenament. RTR, C. Albin

Sco preparaziun sin il campiunadi europeic ha l'equipa naziunala da l'Austria trenà l'emna vargada a Schluein sin il plaz da l'Uniun Sportiva Schluein Glion. Cun l’andament da l'emna è il president da l'uniun Simon Lutz fitg cuntent.

Il punct culminant dal punct da vista da l'uniun è segiramain stà il gieu amicabel encunter l'Austria. In gieu, ch'els han pers 14:0, che ha dentant era purtà ina bella summa en cassa. Daners, che l'uniun sa duvrar. Tenor Simon Lutz custa per exempel il mantegniment dal plaz actual circa CHF 30'000.- ad onn.

Duas equipas per onn

Era sche tals camps da trenament èn ina buna fatschenta per l'uniun, il president Simon Lutz na vul tuttina betg dapli camps d'autras equipas a Schluein. Gliez muntass numnadamain, ch’i stuess vegnir construì in ulteriur plaz, in plaz artifizial per schanegiar il plaz natiral. Vinavant stuess la lavur cumina da l’uniun durant quels camps vegnir surpigliada d’ina organisaziun professiunala. Tut quai auzass dentant considerablamain ils custs.