Siglir tar il cuntegn

Header

cuntegn

Surselva Dus frars cun ina colliaziun speziala

Pervia d’ina desditga dals gnirunchels è Martial Tuor da Rabius stà avisà sin in gnirunchel. Quest organ ha el survegnì da ses frar Eduard.

Avant 15 onns ha ina malsogna midà la vita da Martial Tuor da Rabius. Ord motivs nunenconuschents n'han ses gnirunchels tuttenina betg pli lavurà en urden. Spert èsi stà cler ch'el dovra cun 40 onns in nov gnirunchel.

audio
Mezdi: Sche tes frar dovra in nov organ – l'istorgia dals frars Tuor
ord Actualitad dals 02.10.2018.
laschar ir. Durada: 5 minutas 2 Secundas.

Ils fragliuns èn vegnids en agid

Durant bun in onn ha Martial Tuor savì prender medicaments. Per evitar la dialisa era el dentant avisà sin in nov organ. Suenter divers discurs cun medis, la famiglia ed ils fragliuns èn ses frars sa declerads pronts da laschar sclerir sch'els fissan donaturs adattads. La finala han ils tests lura mussà, che ses frar Eduard Tuor ch'è 9 onns pli giuven è in donatur adattà. Per Eduard èsi er immediat stà cler ch'el less gidar. Uschia ch'el ha avant 15 onns dà in da ses dus gnirunchels sauns a ses frar. Quai haja rinforzà lur relaziun ch'eri gia avant la transplantaziun fitg buna.

Nagins problems suenter la transplantaziun

Martial Tuor ha survegnì suenter la transplantaziun nov sentiment da vita. El haja suenter l'operaziun gì nagins problems da sanadad u cumplicaziuns. Sulettamain avant 4 onns haja el gì ina crisa. Ma uschiglio sappia el viver uschia sco avant la malsogna. Er il donatur Eduard Tuor ha mai gì problems cun la sanadad. El è fitg led, ch’el ha pudì gidar ses frar e che lez è oz puspè uschè fit sco avant la malsogna – uss simplamain cun ina part dad el.

RR actualitad 12:00

Artitgels legids il pli savens