Sche la senda da viandar tras la Ruinaulta vegn realisada per lung dal Rain, teman las organisaziuns per la protecziun d’ambient che la Ruinaulta vegnia inundada da viandants. Per proteger la flora e fauna da quella massa da viandants, han las organisaziuns pretendì che rangers controlleschian la senda ed admoneschian ils viandants che na sa tegnan betg a las reglas.Ch'ils survegliaders chastian surpassaments cun multas na prevesa l'Uniun Ruinaulta betg.
Project da pilot da dus onns
Per ademplir questa pretensiun ha l’Uniun Ruinaulta lantschà in project da pilot cun dus rangers. Il project dura dus onns e vegn organisà ensemen cun il Parc natiral Beverin e l’Arena tectonica Sardona. Ils custs da total 200‘000 francs surpiglian questas trais organisaziuns, tenor il president da l’Uniun Ruinaulta Christian Theus. En emprima lingia vegnan ils rangers dentant a patrugliar en la Ruinaulta. La finamira è da rimnar emprimas experientschas e d'optimar l‘organisaziun dals survegliaders.
