Durant questa stad è la Val Sum Punt a Duvin stada accessibla cun ina via d'urgenza ch'è passabla a pe e cun vehichels pitschen sco in töf u in quad. Uschia saja stà pussaivel da distgargiar las duas alps Radun e Selva senza incaps. La vischnanca dad Ilanz/Glion ha laschà elavurar duas variantas pussaivlas per in nov access en Val Sum Punt.
Ina varianta fiss ina nova via che maina sur il grip da Sum Punt. Questa varianta da la via pretendess da construir in nov vial da circa 1,5 km lunghezza e sur l'entria distanza gronds stabiliments artifizials da crap u palesadas da fier. Ina nova via muntass er ina gronda intervenziun en la natira, sco Marco Casanova, il manader dals manaschis communals declara. Tranter auter fiss in perimeter da prads sitgs da muntada naziunala er tangà dal project da la via. Ina nova via muntia 1,5 km dapli viadi sco er dapli meters da mantegniment.
Access cun in tunnel
La varianta dal tunnel mussia blers avantatgs, di Marco Casanova. Er sche questa varianta saja circa in quart pli chara che la via. Cun in tunnel as possia duvrar vinavant ina gronda part da la Via Varduz existenta ed er objects natirals na sajan betg pertutgads dal project tunnel. I duvrass in tunnel da circa 300 meters lunghezza, e quel avess ina persistenza da 100 onns. Er vegnia quintà ch'il temp per las lavurs d'execuziun fissan pli curtas, perquai ch'ins na saja betg dependent da l'aura durant la construcziun d'in tunnel. Uschia che la Val Sum Punt fiss pli spert puspe accessibla ch'usità. Las sfidas: per l'ina la dumonda nua deponer il material d'exchavaziun e per l'autra l'illuminaziun dal tunnel.
Tunnel varianta preferida
La suprastanza communala dad Ilanz/Glion haja analisà en detagl las duas variantas per l’access en Val Sum Punt. Relativamain spert saja sa mussà, ch'il tunnel saja la varianta favorisada e quai saja er la tenuta da la suprastanza communala. La varianta cun la nova via saja giud maisa, perquai che quella tangass prads setgs da muntada naziunala, e na saja perquai betg pussaivla da realisar. Ussa giaja vid la projectaziun e las lubientschas. La fin dal 2026 vegni il project avant il pievel. Fitg probabel vegnian chantun e Confederaziun a surprender 60–70% dals custs, qua saja dentant anc da sclerir en detagl. Sch'i na dettia nagina opposiziun durant la procedura dal proxim onn quinta Marco Casanova ch'ins possia cumenzar il 2027 cun las lavurs da construcziun. Sche tut va tenor plan duess La Val da Sum Punt puspè esser accessibla sco usità e giavischà l'atun 2028.
