L’interess per la politica communala è gronds a Val Son Pieder. Uschia è la sala da cultura s’emplenida fin a l’ultima plazza e schizunt sin stgala han votantas e votants prendì plaz per eleger ina successura ni in successur per Stefan Schmid. Da quintar eri che l’elecziun dal president va sur plirs scrutinis, ma suenter l’emprima runda era il victur gia tschernì.
Othmar Berni ha survegnì 165 vuschs, quai tar il pli absolut da 164 vuschs, pia ina dapli che necessari. Sia pli ferma concurrenta Rita Schmid Göldi, ch’ha sco suletta dals candidats tegnì in pitschen pled avant las votantas ed ils votants da Val, survegn total 131 vusch. Il terz candidat en la runda Pius Walker survegn la finala 23 e las ulteriuras vuschs van a differentas persunas.
![Vals Wahlen Gemeindepräsident 2024](https://www.rtr.ch/static/cms/images/960w/fce7c8.jpg)
Suprastanza cun maioritad feminina
En suprastanza da Val sesan en l’avegnir trais dunnas. Brigitte Berni-Frei è vegnida reelegida ed Erika Furger-Mittner sco era Sabina Furger èn vegnidas elegidas en suprastanza communala. Jürg Tönz cumplettescha la runda. Betg tanschì per la reelecziun hai per Kevin Stoffel. El ha survegnì en l’emprim sco era en il segund scrutini las pli paucas vuschs da tut las candidatas ed ils candidats. Il temp d’uffizi per la suprastanza nova cumenza gia l’emprim da zercladur.
Stefan Schmid n'ha betg pudì candidar pervia da la limitaziun d'uffizi
A Val hai dà in vair cumbat electoral per il presidi communal. Ina dunna e dus umens han vulì succeder a Stefan Schmid che na po betg pli candidar pervia da la limitaziun d'uffizi. Ch'il suveran da Val ha pudì decider gist tranter 3 persunas resulta da la glista da tractandas da la vischnanca.
Ils candidats e la candidata èn stads:
- Rita Schmid Göldi: giurista ed anteriura cussegliera communala ad Adliswil
- Othmar Berni-Riz: fiduziari ed anteriur deputà da Val
- Pius Walker: scrinari, artist e pur
![Porträts von drei älteren Personen mit neutralem Hintergrund.](https://www.rtr.ch/static/cms/images/960w/04359e.jpg)
Sper in nov president communal u ina nova presidenta communala ha Val era elegì ina nova suprastanza communala. Per la suprastanza che sa cumpona da quatter persunas hai dà set candidatas e candidats:
- Kevin Stoffel (en uffizi)
- Brigitte Berni-Frei (en uffizi)
- Jürg Tönz (en uffizi)
- Kaspar Berni (nov)
- Erika Furger-Mittner (nov)
- Sabina Furger (nov)
- Bernhard Schlegel (nov)