Per l’emprima giada suenter la fusiun l'onn 2014 elegia la vischnanca da Glion ils gremis politics senza sez garantì per las differentas fracziuns
Suprastanza – dus chalan, trais restan
Sper la presidenta communala, Carmelia Maissen, stattan era Caroline Gasser e Hanspeter Bundi vinavant a disposiziun per in'ulteriura perioda d’uffizi en suprastanza. Abditgà lur post han il vice-president Roman Cantieni e Damian Cadalbert. Da nov candideschan Alice Bertogg da Sevgein e Martin Capeder da Duvin per in post en suprastanza
Cussegl da vischnanca – dapli candidaturas che posts
Per ils 25 posts en il cussegl da vischnanca candideschan 29 persunas. 20 da quellas vegnan ord las fracziuns da Glion, Rueun e Castrisch. Sche quels vischinadis che han la gronda part da la populaziun sustegnan sulet lur candidats e candidatas, alura savessan las fracziuns pitschnas vegnir a la curta en il parlament communal
En nossa vischnanca avain nus quella sensibilitad da chattar in bun equiliber tranter il center e las fracziuns perifericas.
La relaziun cussegl da vischnanca e suprastanza communala
Gia dapi la fusiun è la relaziun tranter il cussegl da vischnanca e la suprastanza communala magari tendida. Il fain sin il medem ladritsch han las duas organisaziuns mai propi gì. Quai è sa mussà en differents projects ch’il cussegl da vischnanca ha refusà da tractar.
Il cussegl da vischnanca è qua per auzar la vusch, per far attent sin problems u sin chaussas che mancan, dentant èsi betg il pensum dal parlament da vegnir cun la schliaziun. Gliez è il pensum da la executiva.
