Las stentas da la chasa da tgira «DaCasa val Lumnazia» èn grondas. En tut èn vegnids organisads quatter posts, nua che mintgamai las emprendistas pon declerar e mussar lur savida.
- Sin l’emprim post è da mesirar la pressiun dal sang e la fevra.
- Il segund post è deditgà al nutriment, e co pudair porscher agid a persunas attempadas.
- Il terz post è ina poppa d’exercizi, nua ch’ins po trenar da far ina faschadira ed era da dar ina squitta.
- Ed il quart post, nua ch’in pazient po vegnir auzà or dal letg cun ina maschina e plazzà en ina sutga da rodas per pudair far ina spassegiada.
Per la responsabla dals emprendists en chasa da tgira, Marie-Theres Riedi, èsi stà impurtant da porscher posts ch’èn datiers a la lavur reala dal mintgadi – ma era lavurs interessantas e spectacularas, sco dar ina squitta ni auzar in pazient or dal letg. La lavur ha gia rendì, sche nus vegnin da motivar sulet ina persuna da far in emprendissadi, accentuescha Marie-Theres Riedi.
Sfida en general da chattar emprendists
La clamada saja ina clamada engraziaivla ed ella faschessia puspè la medema schelta, di Simona Monn, manadra da partiziun e tgirunza diplomada. Dentant dettia quai adina temps da lavur irregulars ed era da lavurar las fin d’emnas. Quai na plaschia betg a tuts, di Monn. Ma declerar, daco che betg dapli persunas vulan far ina professiun en la tgira na possia ella betg.
La proxima giada betg ina mesemna
Sco la responsabla per las emprendistas, Marie-Theres Riedi di, vegnian els a ponderar per la proxima giada da betg far la purschida ina mesemna. Durant in di da scola avessan las scolaras ed ils scolars probabel survegnì liber per visitar la purschida, e quai avessia forsa attratg dapli giuvenils, di Riedi. Dentant a lunga vista na possia ella betg dir, co agir vinavant. Pliras instituziuns, sco ospitals ed auters, tschertgan gia emprendistas. Alura saja ina chasa da tgira a la periferia almain betg la schelta preferida d’ina persuna giuvna. Quai chapeschia ella bain. Ma giavischar possian ins tuttina da chattar persunas giuvnas.
Ils ultims onns hajan els gì il cletg che persunas che lavuran gia en la tgira sajan sa decididas da far ina scolaziun fundada en la professiun, e perquai hajan ins adina puspè chattà emprendistas ed emprendists.