Siglir tar il cuntegn

Header

Navigaziun

Fotografia da Justina Heisch.
Legenda: Avant 15 onns era Justina Heisch anc en l'emprendissadi. RTR, Anna Selina Quinter
cuntegn

Emprendissadi cun 42 onns Da l'emploiada enavos tar l'emprendista

15 enfin 18 onns. Uschè vegls èn ils blers che cumenzan in emprendissadi. Justina Heisch è stada in'exota. Ella ha numnadamain fatg l'emprendissadi en la vegliadetgna da 42 onns.

Justina Heisch è da Cumbel, ella ha 57 onns e lavura en l'ospital regiunal a Glion. Per savair far la lavur ch'ella fa oz, ha ella dentant stuì prender ina decisiun in pau extraordinaria. Oriundamain aveva ella fatg la scola da puras e silsuenter in emprendissadi sco tgirunza d'uffants. Ella ha lavurà quatter onns sin la staziun da naschientschas en il Spital regiunal Surselva ed è suenter sezza vegnida mamma.

Da la tgirunza d'uffants a la tgirunza

Lura ha Justina Heisch surpiglià il servetsch da notg en la chasa da tgira a Cumbel. Spert è vegnì cler ad ella, ch'ella aveva pauc da dir cunquai ch'ina tscherta scolaziun profundada mancava ad ella. Avant 15 onns, pia cun 42, è ella perquai sa decidida da far in proxim pass e far in emprendissadi sco tgirunza a la scola da tgirunzas a Glion.

Quai è stà fitg curius da puspè ir a scola, gist cun tants giuvens. Ils blers na prendevan quai betg uschè serius sco jau. Per mai era cler: jau stoss dumagnar quai, jau aveva gea anc speras ina chasa, il tegnairchasa ed ina famiglia.
Autur: Justina Heischtgirunza chirurgia

Cun 42 anc ina giada ir a scola

Cunquai che Justina Heisch era adina interessada vid il carstgaun e tge che capita cun il corp n'ha ella betg fatg vess d'ir a scola. La pli gronda sfida per ella eran las lavurs cun il computer. En scola era Justina Heisch in pau l'exota. Ils blers en sia classa eran en la vegliadetgna da 18 onns.

Jau hai era profità da mia vegliadetgna. Jau n'aveva betg pli ils medems pensiers sco las pli giuvnas. Jau n'aveva betg pli problems sco mal d'amur. Là hai jau schon fatg persenn grondas differenzas. En quella vegliadetgna eran ellas anc vid sa sviluppar.
Autur: Justina Heischtgirunza chirurgia

RR actualitad 08:00