Siglir tar il cuntegn

Header

cuntegn

Surselva Emprendists da miradur mancan en Surselva

En la scola professiunala a Glion fineschan tschintg giuvens l’emprendissadi da miradur. La festa da diplom è la fin da zercladur. In dals finalists è Fabian Nett dad Andiast.

L'emprendist miradur Fabian Nett è cuntent da sia tscherna da professiun: lls ultims trais onns sajan passads spert ed i saja bel da vesair tge ch’ins haja emprendì.

audio
Mezdi: En Surselva mancan ils emprendists da miradur
ord Actualitad dals 16.06.2017.
laschar ir. Durada: 3 minutas 1 Secunda.

Cura che Fabian Nett aveva finì la scola n'haja el betg savì propi sch’el veglia emprender ina lavur en in biro ubain insatge manual. Suenter in fufragnadi da miradur saja el sa decidì per questa professiun, perquai ch’ins haja fitg bunas pussaivladads da sa scolar enavant.

Emprendissadi è vegnì pli e pli varià

A l’entschatta stueva l'emprendist far lavurs sco gidar als auters miradurs. Cun il temp haja el emprendì da far pli e pli sez ed uss possia el far pli u main tut sez. Miradur saja ina professiun cun blera variaziun, raquinta Fabian Nett. (Cura che nus avain fatg l'intervesta fascheva el in mir en ina chasa dad ina famiglia a Trun - Pustget).

Las classa d'emprendissadi pitschnas n'èn betg in avantatg

In sguard en la statistica da la scola professiunala a Glion mussa dentant ina digren dals emprendists sur ils onns da scola:

  • 2013/14 – 12 giuvenils
  • 2014/15 – 10 giuvenils
  • 2015/16 – 3 giuvenils
  • 2016/17 – 12 giuvenils
  • 2017/18 – 7 annunzias da giuvenils

Paucs emprendists dat classas pitschnas e la scola pateschia pervi da quellas, di il scolast da miradurs Rino Deflorin a RTR. Uschia saja quai fitg grev da dar scola cun materias differentas. In dumber giavischà fiss otg scolars en ina classa. Pli baud avevan els normalmain tranter 12 e 15 scolars.

Surtut l’onn da scola 2015/16 saja quai stà critic. Alura aveva quai gì num, ch’els stoppian metter ensemen classas.

Deflorin: Plirs motivs per la digren

Motivs per la digren da questa professiun èn tenor Rino Deflorin il temp digital e la giuventetgna, che giaja en autras direcziuns, la reducziun da las naschientschas e las consequenzas da l’iniziativa da segundas abitaziuns. Pli baud en las famiglias grondas saja il bab savens er stà mastergnant ed in fin dus figls faschevan il medem.

I saja però grev da cumbatter questas tendenzas. Ins possia be empruvar da far pli attractiv quest emprendissadi e da mussar anoravers, quant interessant che quel saja.

Ir a Cuira a scola

Sche la digren da emprendists da miradur cuntinuescha en Surselva teman ins, che las classas a Glion vegnian schliadas ed ils scolars ston forsa ir a Cuira a scola. Quai èsi vegni ditg avant in temps a la radunanza dals impressaris da la Surselva.

RR actualitad 12:15

Artitgels legids il pli savens