Ses emprim onn saja stà multifar ed el haja empruvà da survegnir ina survista, di Stefan Gabriel. El è il liom tranter la scola ed il cussegl da scola. I dat blera lavur che na chalia betg venderdi saira. El emprovia dad esser al puls, ma quai na saja betg simpel cun in consorzi cun 3 chasas da scola, 37 persunas d’instrucziun e 200 scolaras e scolars. Mo el veglia dar confidenza e stima per la gronda lavur da las persunas d’instrucziun.
Visitas en scola
Stefan Gabriel fa era visitas en scola. Quai na saja betg ina controlla. El fetschia quai per reflectar, sviluppar la lavur e per sa gidar cun scolastas e scolasts. In dals gronds pensums che stat avant porta è il plan d’instrucziun 21.
Manaschi ruassaivel
Il consorzi da scola Sumvitg-Trun è en funcziun dapi l’onn da scola 2013/14. Fusiunar veglia dir che bleras culturas vegnian ensemen, e quai n`è betg adina simpel. Mo uss hajan els in manaschi che giaja ruassaivel e che surveschia al prosperar dals uffants. Ina dumonda centrala saja: Tge scola veglian els?
Mo anc 2 chasas da scola
Sco Stefan Gabriel ha ditg ad RTR datti a partir dal onn da scola 2017/18 mo pli 2 chasas da scola en il consorzi: ina a Trun e l’autra en la vischnanca da Sumvitg.
RR actualitad mezdi