Emprim parc motoric dal Grischun a Trin

La vischnanca da Trin ha approvà in credit da CHF 50’000.- per sustegnair il project da la gruppa d’interess Sport Kids Trin.

Sin questa part da l'areal vegn il parc motoric construì. Bild in Lightbox öffnen.

Legenda da maletgs: Sin questa part da l'areal vegn il parc motoric construì. RTR, C. Albin

In parc motoric (Motorikpark) n’ha da far nagut cun motors, benzin e canera. In parc motoric è in parc da moviment, ina sort plazza da gieus, cun differents elements per trenar la forza, la spertadad ni era igl equiliber. Ils elements èn construids uschia, che buc mo uffants pon giugar là. Era creschids san far sin quels elements trenaments pli intensivs. Il parc motoric a Trin è l’emprim project per in tal parc en il Grischun.

Silvia Capatt da Sport Kids Trin sin l'areal en la val Bergla nua ch'il parc motoric duai vegnir construì. Avrir maletg en lightbox.

Legenda da maletgs: Silvia Capatt da Sport Kids Trin sin l'areal en la val Bergla nua ch'il parc motoric duai vegnir construì. RTR, C. Albin

Iniziativa da Sport Kids Trin

L'iniziativa da realisar in tal parc vegn da la suprastanza da la gruppa d'interess Sport Kids Trin. Quella gruppa porscha differentas activitads sportivas per uffants da 5 enfin 10 onns ed ha gudagnà l’onn passà grazia a quella lavur in premi da CHF 25'000.-. Tenor Silvia Capatt da la suprastanza, haja la gruppa d'interess betg simplamain vulì cumprar p.ex. novs tricots cun quels daners. Els hajan vulì realisar insatge persistent per ils uffants. En quella vegliadetgna na sajan uffants dentant betg pli cuntents cun ina simpla plazza da giugar ed uschia hajan els decidì da bajegiar in parc motoric.

In parc era per autras uniuns

In auter avantatg da bajegiar in parc motoric enstagl d’ina plazza da giugar saja, ch’in tal parc possia era vegnir duvrà da las autras uniuns sportivas da Trin. Uschia possian pliras persunas profitar dal premi che Sport Kids Trin haja gudagnà.

Ils custs per realisar il parc da moviment sco planisà da la gruppa d'interess muntan a CHF 200'000.-, bler dapli che per ina simpla plazza da giugar. Quella differenza haja dentant era ses motivs. Els veglian nizzegiar elements fitg variants e da buna qualitad, per ch’il parc possia vegnir utilisà ditg. Actual ha la gruppa recaltgà ca. CHF 160'000.-. Tenor Silvia Capatt duajan las lavurs da construcziun entschaiver la primavaira 2018 e l'avertura succeder in fin dus mais pli tard. Quai dettia a la gruppa anc in per mais peda da recaltgar ils daners che mancan per realisar il parc da moviment a Trin.

RR actualitad 17:00

Laschar ir video «Parc da moviment a Trin»

Parc da moviment a Trin

3:03 min, Minisguard dals 28.10.2017